Home > General > మూడీస్ తో మార్పు వస్తుందా

మూడీస్ తో మార్పు వస్తుందా

ఆధార్ గడువు మళ్లీ పెరగనుంది...
కడప నుండి మైసూర్, చెన్నైకి సర్వీసులు

moodys-apduniaబిఎఎ3 నుంచి బిఎఎ2కు భారత్ సావరిన్ రేటింగ్ అంతర్జాతీయ క్రెడిట్ రేటింగ్ సంస్థ మూడీస్ పెంచింది. బిఎఎ2 అంటే ఇన్వెస్ట్‌మెంట్ గ్రేడ్ కంటే ఒక మెట్టు పైన అని చెప్పవచ్చు. సంస్థాగత, ఆర్థిక సంస్కరణలు, ప్రత్యేకించి జిఎస్‌టి(వస్తు, సేవల పన్ను) ప్రవేశపెట్టడం, బ్యాంకులకు మూలధన నిధి ప్రణాళిక వంటి అంశాలు భారత్‌కు కీలక బలాలుగా భావిస్తున్నారు. అంతర్జాతీయ క్రెడిట్ రేటింగ్ సంస్థ మూడీస్ మాదిరిగా మరో రెండు గ్లోబల్ రేటింగ్ ఏజెన్సీలు భారత్ రేటింగ్‌ను పెంచుతాయా? అంటే అది మిలియన్ డాలర్ల ప్రశ్నే అవుతుంది. ఆర్థిక సంస్కరణలతో వృద్ధి దిశలో పయనిస్తున్న భారత్ రేటింగ్‌ను సవరించి ‘సానుకూలం’ నుంచి ‘నిలకడ’గా రేటింగ్‌ను ఇచ్చింది. క్రెడిట్ రేటింగ్స్ దేశ ద్రవ్య, ఆర్థిక, నియంత్రణ విధానాలకు కొలమానంగా భావిస్తారు. ఉత్తమ రేటింగ్స్ ఉంటే ఆ దేశం, కంపెనీలు అంతర్జాతీయ మార్కెట్‌లో ఎక్కువ పెట్టుబడులను సమీకరించేందుకు అవకాశాలు ఉంటాయి. అయితే మాజీ ప్రధాని మన్మోహన్ సింగ్ భారత ఆర్థిక వ్యవస్థ రేటింగ్‌ను పెంచడం చూసి దాని వలలో పడొద్దని హెచ్చరించారు. ఆర్థిక వ్యవస్థ ఇంకా గండం నుంచి గట్టెక్కలేదని, ఆర్థికవ్యవస్థకు పటిష్ఠమైన, ప్రయోజనకరమైన మార్గదర్శనం కావాలని అన్నారు. అప్పుడే ప్రభుత్వం చెబుతున్నట్టు వృద్ధిరేటు 8 నుంచి 10 శాతానికి చేరుకోలదని అన్నారు. అంతర్జాతీయంగా చుక్కలనంటుతున్న ముడి చమురు ధరలు రానున్న రోజుల్లో ఆర్థిక వ్యవస్థపై దుష్ప్రభావం చూపే అవకాశం ఉందని మన్మోహన్ హెచ్చరించారు. మరోవైపు మాజీ ఆర్థికమంత్రి చిదంబరం కూడా ప్రస్తుత ఆర్థిక సంవత్సరంలో వృద్ధి రేటును ప్రభుత్వం, మూడీస్ సంస్థ 6.7 శాతంగా పేర్కొంటున్నాయని అన్నారు. 2015-16లో వృద్ధి రేటు 8 శాతం, 2016-17లో 7.1 శాతంతో పోలిస్తే ఇది తక్కువేనని అన్నారు. కాగా వచ్చే ఏడాది జిడిపి వృద్ధి రేటు 7.6 శాతంగా ఉండనున్నదని, ఫలితంగా అమ్మకాలు పుంజుకుంటాయని మూడీస్ చెబుతోంది. ఆయిల్, రియల్టీ, వాహన, వాహన విడిభాగాలు, ఐటీ సర్వీసుల కంపెనీలకు నిలకడ దృక్పథంను ఇచ్చింది. తీవ్రమైన పోటీ కారణంగా ఆదాయం, మార్జిన్లపై ఒత్తిడి నెలకొంటుందని, అందుకని టెలికం కంపెనీలకు మాత్రం ‘ప్రతికూలం’ దృక్పథంను ఇచ్చింది. జిఎస్‌టి పన్ను రేట్లలో మరింతగా సరళీకరణ, ఇతర సంస్థాగత సంస్కరణలు, తదితర అంశాల కారణంగా కంపెనీల నిర్వహణ లాభం పెరుగుతుందని పేర్కొన్నారు. దీంతో కంపెనీల రు ణ పరిస్థితులు మెరుగుపడతాయని వివరించారు. ఆస్తుల వేల్యూయేషన్లు మెరుగుపడడం కూడా కొన్ని కంపెనీల రుణ పరిస్థితులు మెరుగుపడడటానికి దారితీస్తుందని పేర్కొన్నారు. అయితే వృద్ధి 6 శాతం కంటే తక్కువగా ఉండడం, కమోడిటీ ధరలు తగ్గడం వంటి ప్రతికూలతలు చోటు చేసుకుంటే మాత్రం కంపెనీల స్థూల లాభాల్లో వృద్ధి తక్కువగా ఉండే ప్రమాదం ఉందని హెచ్చరించారు.

Tags:

Leave a Reply

Your email address will not be published. Required fields are marked *

Facebook Auto Publish Powered By : XYZScripts.com