Home > Editorial > చంద్రులు ఇద్దరు దొందు..దొందే

చంద్రులు ఇద్దరు దొందు..దొందే

సంస్కృతి, సాంప్రదాయాలకు నిలువుటద్దం బతుకమ్మ
కశ్మీర్ సమస్య పరిష్కారం దిశగా అడుగులు

chandrababu-kcr-apdunia-ఖర్చుల్లో పోటీ… ఆర్భాటానికి పెద్ద పీట
-కాన్వాయ్‌ల దగ్గర నుంచే విలాసాలు…

రాష్ట్ర విభజన జరిగిన తర్వాత, తెలుగు రాష్ట్రాలు రెండుగా అయిన తర్వాత.. డెవలప్ మెంట్ లో పోటాపోటీ ఉంటే అది మంచిదే అయ్యేది. కానీదుర‌దృష్ట‌కరమైన అంశం ఏమిటంటే.. రెండు రాష్ట్రాలు అయ్యాకా, ఇద్దరు ముఖ్యమంత్రులు వచ్చాకా.. హంగులూ, ఆర్బాటాలకు ఖర్చులు పెరగుతోంది! ప్రజాధనంతో ఇద్దరు ముఖ్యమంత్రులూ ఆట ఆడేసుకుంటున్నారు. అత్యంత విలాసవంతమైన వాహనాలు, తమ వ్యక్తిగత ప్రతిష్టను పెంచుకునేందుకు ఇస్తున్న కానుకలు, కట్నాలతో..ముఖ్యమంత్రులిద్దరూ ప్రజాధనాన్ని చిల్లాడేస్తున్నారు!ఉభయ తెలుగు రాష్ట్రాల్లో పరిస్థితులను గమనించాకా కలిగే అభిప్రాయం ఇది. అటు ఏపీ ముఖ్యమంత్రి చంద్రబాబు నాయుడు, ఇటు తెలంగాణ ముఖ్యమంత్రి కేసీఆర్.. వీళ్ల హంగులూ, ఆర్బాటాలను గమనిస్తే వీళ్లు నడుపుతున్నది భారత్ వంటి అభివృద్ధిచెందుతూ ఉన్న దేశంలోని రాష్ట్రాల ప్రభుత్వాలనా? లేక.. డబ్బు ఎక్కువై ఏం చేసుకోవాలో అర్థం కానటు వంటి స్థితిలో ఉండే ఆర్థిక వ్యవస్థలనా? అనే సందేహం కలుగకమానదు.ముఖ్యమంత్రిగా గద్దెనెక్కిన ఏడాదిలోనే మూడు సార్లు కేసీఆర్ కాన్వాయ్ మారింది. వాహనాల రంగులు మార్చడానికే నాలుగు కోట్ల రూపాయలను ఖర్చు చేశారు తొలిసారి. మొదట బ్లాక్ కలర్ ఫార్చూనర్లు తీసుకున్నారు ఆ తర్వాత వాటి స్థానంలో తెల్ల రంగు ఫార్చూనర్లు వచ్చాయి. దానికి గానూ అయిన అదనపు ఖర్చు నాలుగు కోట్ల రూపాయలు. ఆ తర్వాత కేసీఆర్ ఐదు క్రూజర్ ప్రాడో వాహనాలను తెప్పించుకున్నారు. వాటి ఒక్కోదాని ధర కోటీ పది లక్షల రూపాయలు! ఒక్కమాటలో చెప్పాలంటే.. ప్రస్తుతం దేశంలో రాష్ట్రపతి, ప్రధానమంత్రి కాన్వాయ్ ల తర్వాత అత్యంత ఖరీదైన కాన్వాయ్ ను కలిగి ఉన్నది తెలంగాణ ముఖ్యమంత్రి కేసీఆరే!ఇక దేశంలోనే ఎక్కువ కాన్వాయ్ వాహనాలను కలిగిన వ్యక్తి ఏపీ సీఎం చంద్రబాబు నాయుడు. బాబు కాన్వాయ్ లోని మొత్తం వాహనాల సంఖ్య 36! అత్యంత ఖరీదైన, విలాసవంతమైన వాహనాలు ఇవి. అన్నీ ప్రభుత్వ సొమ్ముతో కొన్నవే. బాబు సీఎంగా బాధ్యతలు స్వీకరించాకా కొనుగోలు చేసినవే. వీటిని మూడుగా విభజించారు. హైదరాబాద్ ఒక కాన్వాయ్, విజయవాడలో మరోటి, తిరుపతిలో ఇంకోటి.. ఇలా బాబు ఎక్కడకు వెళితే అక్కడకు కాన్వాయ్ లు సిద్ధంగా ఉంటాయి.ఆ మధ్య తెలంగాణలో జిల్లా పర్యటనకు అని ముఖ్యమంత్రి కేసీఆర్ ఐదు కోట్ల రూపాయలతో సర్వసదుపాయాలనూ కలిగిన ఒక బస్సును కొనుగోలు చేశారు. ఆ తర్వాత నెల రోజుల్లోనే ఏపీ సీఎం కు కూడా ఒక విలాసవంతమైన బస్సును కొనుగోలు చేశారు. దాని ధర అక్షరాలా ఆరు కోట్ల రూపాయల పైనే!తన చేతికి వాచీ ఉంగరం లేదు.. అని బాబు తరచూ వాపోతూ ఉంటారు. అవేవీ లేకపోయినా.. విలాసాల్లో మాత్రం ఏపీ సీఎంకు సాటి వచ్చే వారు లేరు. గత మూడేళ్లలో బాబు వ్యక్తిగత నివాసాలకు, క్యాంపు ఆఫీసుల నిర్మాణానికి, బాబు కుటుంబం హైదరాబాద్ లోని పార్క్ హయత్ హోటల్ లో కొన్ని నెలల పాటు బస చేయడానికి ఖర్చు అయిన మొత్తం కొన్ని పది కోట్ల రూపాయల పైనే.. అంటే, అందులో ఆశ్చర్యం ఏమీ లేదు. ఇక తెలంగాణ సీఎం, ఏపీ సీఎంల మధ్య ప్రజాధనాన్ని సంతర్పణ చేయడంలో కూడా ఒక విధమైన పోటీ ఉందని ప్రతిపక్షాల వాళ్లూ, విశ్లేషకులు వ్యాఖ్యానిస్తున్నారు. క్రీడాకారులకు పోటాపోటీగా, ఒకరిని మించిన స్థాయిలో మరొకరు కోట్ల రూపాయలను ప్రోత్సాహకాలుగా ప్రకటించడంపై కూడా కొన్ని విమర్శలు తప్పలేదు. అలాగే పండగలకూ, పబ్బాలకూ ఉచిత కానుకల పేరుతో.. కోట్ల రూపాయల సంతర్పణ చేయడంపై కూడా కొన్ని విమర్శలున్నాయి. సంక్రాంతికో, రంజాన్ కో.. ప్రజలేమీ ఉచితంగా సరుకులు కావాలని కోరుకోవడం లేదు. కానీ అలాంటి కార్యక్రమాలతో వ్యక్తిగత ఇమేజ్ ను పెంచుకోవడానికి కోట్ల రూపాయలు వెచ్చిస్తున్నారు. సంక్షేమ కార్యక్రమాలు తప్పు కాదు కానీ, సుదీర్ఘ ప్రయోజనాలు ఉండే వాటిపై పెడితే అందులో అర్థం ఉంటుంది. అలాగాక.. తాత్కాలికమైన వ్యవహారాలపై కోట్లు పెట్టడంపై మాత్రం విమర్శలు తప్పడం లేదు.
ఏపీ తాత్కాలిక సచివాలయాన్ని నిర్మించడానికి కనీవినీ ఎరగని రీతిలో ఖర్చు చేశారు. అక్షరాలా తొమ్మిది వందల కోట్ల రూపాయల పై స్థాయి మొత్తం వెచ్చించి నిర్మించిన సచివాలయం.. కేవలం తాత్కాలికం మాత్రమే. ఇక ఈ వర్షాకాలంలో ఏపీ సచివాలయం లోపలికి నీరు వెళ్లిన తీరును గమనించి అంతా విస్మయానికి గురి అయ్యారు. హైదరాబాద్ ను తాత్కాలిక రాజధానిగా వాడుకునే అవకాశం ఉన్నప్పటికీ మరో తాత్కాలిక రాజధానిని ఏర్పరిచి.. చంద్రబాబు వేల కోట్ల రూపాయలను వెచ్చించారు. ఇక తెలంగాణ సెక్రటేరియట్ ది మరో వ్యథ. వాస్తు దోషం పేరుతో.. కొత్త సెక్రటేరియట్ నిర్మాణానికి రంగం సిద్ధం అవుతోంది. ఉన్నదాన్ని వదులుకుని వందల కోట్ల రూపాయల పందేరానికి రంగం సిద్ధం అవుతోంది. ఈ విషయంలో ఏపీ ప్రభుత్వం వలే అంతర్జాతీయ డిజైన్లు అంటు కేసీఆర్ కూడా హంగామా చేస్తున్నారు.

Leave a Reply

Your email address will not be published. Required fields are marked *